Qeveria e Kosovës ka ndarë 10.9 milionë euro për implementimin e pakos emergjente fiskale, bëhet e ditur në një komunikatë nga zyra e kryeministrit në detyrë të Kosovës, transmeton Gazeta Express.
Në komunikatë thuhet se 9.4 milionë janë ndarë për MEPTINIS ndërsa 1.5 milionë për Ministrinë e Financave dhe Transfereve.
Kjo është komunikata e plotë:
Me kërkesë të Kryeministrit në detyrë të Republikës së Kosovës, Albin Kurti, dhe në pajtim Rregulloren e Punës së Qeverisë, është mbajtur mbledhja korresponduese (mbledhja elektronike) e 32 e Qeverisë, në të cilën ka shqyrtuar dhe miratuar vendimin për ndarjen e mjeteve financiare për zbatimin e Pakos Emergjente Fiskale.
9,400,000.00 euro janë ndarë për Ministrinë e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike dhe 1,500,000.00 euro për Ministrinë e Financave dhe Transfereve.
Mjetet e ndara do të merren nga kontigjenca në Ministrinë e Financave dhe Transfereve në kategorinë e shpenzimeve dhe mallrave dhe nga kategoria e subvencioneve dhe transfereve.
