Energjia eklektike vazhdon të mos jetë stabile në vendin tonë.
Ministrja e Ekonomisë, Artane Rizvanolli duke folur për situatën energjetike në vend, ka thënë se reduktimet e rrymës mund të ndërpriten atëherë kur të kthehet në funksion Blloku B2 i KEK’ut, dhe kur Shqipëria të fillojë të prodhojë rrymë më shumë, nëse atje shtohen të reshurat atmosferike.
Ajo thotë se kthimi i bllokut “B2” dhe situata e reshjeve në Shqipëri mund ta nxjerrin Kosovën nga kriza.
“Mund të shpresojmë te përmirësimi i gjendjes atmosferike në Shqipëri në mënyrë që kur ata të plotësojnë nevojat e tyre të na huazojnë energjinë në formë të këmbimit e jo me tarifa të tregut, në mënyrë që ne mund t’ua kthejmë në një kohë kur kemi prodhim më shumë”, deklaroi Rizvanolli.
Por, sa janë këto pritje reale?
Blloku B2 edhe mund të kthehet në funksion, pavarësisht se nuk nuk dihet nëse kjo do të ndodhë shpejtë apo jo. Por varja e shpresave se Shqipëria mund të na huazojë energji elektrike që atë të ia kthejmë pastaj verës, duket më shumë iluzon. Po flasim për huazim të energjisë elektrike, në një kohë kur e gjithë Europa po përballet me një krizë të tillë, dhe çmimi i saj ka prekur majat si kurrë më parë. Atëherë, cili do të ishte interesi i Shqipërisë që t’i huazojë Kosovës energji elektrike, kur atë mund ta shesë në tregun ndërkombëtar me çmimin më të volitshëm ndonjëherë. Pra, nga kjo mund të konstatojmë, se ky dimër për Kosovën do të jetë shumë i rëndë, dhe me reduktime të rrymës sikur në dekadën e parë të pasluftës.
Rizvanolli në RTV Dukagjini ka thënë se në tetë ditët e fundit situata energjetike në Kosovë është përkeqësuar jashtë mase.
“Prej disa ditëve jemi duke marrë vërejtje nga organizata e Transmisioneve të Evropës për shkak të disbalancës mes kërkesës dhe ofertës. Ne kemi rrezikuar jo vetëm sistemin tonë energjetik por edhe atë të Shqipërisë dhe Evropës. Për shkak të këtij kodi të operimit KOSTT ka kërkuar të bëhen reduktime”.
Rizvanolli thotë se plani është që të ketë reduktime 8 orë me rrymë e dy pa të.
“Kemi kërkuar nga KEDS-i që të lajmërojnë më herët qytetarët në mënyrë që të bëhen planifikimet me kohë”, tha ajo, përcjell Telegrafi.
Ministrja e Ekonomisë duke folur për subvencionimin prej 20 milionë euro për KEDS-in ajo thotë se këtë gjë e kanë bërë edhe vendet tjera.
Ajo thotë se blloqet e KEK-ut bien edhe gjatë verës por atëherë nevoja për konsum është më e vogël dhe ajo nuk vërehet.
Rizvanolli thotë se gjendja nuk është e lehtë dhe kriza nuk do të kalojë së shpejti.
